Duodécimo Kaléndas Augústi
_
Romæ sanctæ Praxédis Vírginis, quæ, in omni castitáte et lege divína cum esset erudíta, vigíliis et oratiónibus atque jejúniis assídue vacans, quiévit in Christo, sepúltaque est, juxta sorórem suam Pudentiánam, via Salária.
Babylóne sancti Daniélis Prophétæ.
Cománæ, in Arménia, sancti Zótici, Epíscopi et Mártyris; qui sub Sevéro coronátus est.
Massíliæ, in Gállia, natális sancti Victóris, qui, cum esset miles, et nec militáre neque idólis sacrificáre vellet, hinc, primo in cárcerem trusus ibíque ab Angelo visitátus, deínde váriis cruciátibus punítus, novíssime, contrítus in mola pistória, martýrium consummávit. Passi sunt cum ipso et tres mílites, id est Alexánder, Feliciánus et Longínus.
Trecis, in Gállia, pássio sanctórum Cláudii, Justi, Jucundíni et Sociórum quinque, sub Aureliáno Imperatóre.
Ibídem sanctæ Júliæ, Vírginis et Mártyris.
Argentoráti sancti Arbogásti Epíscopi, miráculis clari.
In Sýria sancti Joánnis Mónachi, qui éxstitit colléga sancti Simeónis.