Tertiodécimo Kaléndas Septémbris
_
In território Lingoniénsi deposítio sancti Bernárdi, primi Clarævallénsis Abbátis, vita, doctrína et miráculis gloriósi, quem Pius Octávus Póntifex Máximus universális Ecclésiæ Doctórem declarávit, et confirmávit.
Romæ deposítio sancti Pii décimi, Papæ et Confessóris, fídei integritáte et ecclesiásticæ libertátis propugnatóris invícti, religionísque zelo insígnis, cujus festum tértio Nonas Septémbris recólitur.
Apud montem Senárium, in Etrúria, natális sancti Manétii Confessóris, e septem Fundatóribus Ordinis Servórum beátæ Maríæ Vírginis; qui, eídem hymnos dicens, expiravit. Ipsíus autem ac Sociórum festum prídie Idus Februárii celebrátur.
In Judǽa sancti Samuélis Prophetæ, cujus sancta ossa (ut beátus Hierónymus scribit) Arcádius Augústus Constantinópolim tránstulit, et prope Séptimum collocávit.
In Cypro sancti Lúcii Senatóris, qui, perspécta constántia Theodóri, Cyrenénsis Epíscopi, in martýrio pósiti, ad Christi fidem est convérsus, et ad eam étiam Digniánum Prǽsidem pertráxit; cum eóque Cyprum proféctus, ibi, cum álios Christiános pro confessióne Dómini coronári vidéret, ultro se ipsum óbtulit, et cápitis obtruncatióne eándem martýrii corónam proméruit.
In Thrácia sanctórum trigínta septem Mártyrum, qui sub Prǽside Apelliáno pro Christi fide, mánibus pedibúsque præcísis, in camínum ardéntem injécti sunt.
Ibídem sanctórum Mártyrum Sevéri, et Mémnonis Centuriónis; qui, eódem mortis génere consummáti, victóres abiérunt in cælum.
Córdubæ, in Hispánia, sanctórum Mártyrum Leovigíldi et Christóphori Monachórum, qui, in Arabum persecutióne pro Christiánæ fídei defensióne in cárcerem conjécti, ac mox, cervícibus abscíssis, igni tráditi, martýrii palmam adépti sunt.
In Hério ínsula sancti Philibérti Abbátis.
Romæ beáti Porphýrii, qui fuit homo Dei, qui sanctum Mártyrem Agapítum erudívit in fide et doctrína Christi.
In castro Cainóne, in Gállia, sancti Máximi Confessóris, qui éxstitit discípulus beáti Martíni Epíscopi.