Nonis Septémbris
_
Sancti Lauréntii Justiniáni, primi Patriárchæ Venetiárum et Confessóris, qui pontificálem Cáthedram hac die invítus ascéndit, et sexto Idus Januárii obdormívit in Dómino.
Romæ, in suburbáno, beáti Victoríni, Epíscopi et Mártyris; qui, sanctitáte et miráculis clarus, sacerdótium Amiternínæ urbis, totíus pópuli electióne, adéptus est. Póstmodum, sub Nerva Trajáno, apud Cutílias, ubi puténtes et sulphúreæ emánant aquæ, cum áliis Dei servis, relegátus, ab Aureliáno Júdice jussus est suspéndi cápite deórsum; idque cum per tríduum pro nómine Christi passus fuísset, tandem, glorióse coronátus, victor migrávit ad Dóminum. Ejus corpus rapuérunt Christiáni, et honorífica sepultúra Amitérni, in Vestínis, condidérunt.
Constantinópoli sanctórum Mártyrum Urbáni, Theodóri, Menedémi, et Sociórum septuagínta septem ex órdine ecclesiástico; qui a Valénte Imperatóre, pro fide cathólica, in navígio impósiti, jussi sunt in mari combúri.
In Portu Románo pássio sancti Herculáni mílitis, qui, sub Gallo Imperatóre, ob Christi fidem cæsus flagris et cápite obtruncátus est.
Cápuæ sanctórum Mártyrum Quínctii, Arcóntii et Donáti.
Eódem die sancti Rómuli, qui, cum esset Trajáni aulæ prefectus ac sævítiam Imperatóris in Christiános detestarétur, cæsus est virgis, et cápite truncátus.
Melitínæ, in Arménia, pássio sanctórum mílitum Eudóxii, Zenónis, Macárii, et Sociórum mille centum et quátuor; qui, cum abjecíssent milítiæ cíngulum, in persecutióne Diocletiáni, pro Christi confessióne necáti sunt.
In pago Tarvanénsi, monastério Sithinénsi, in Gállia, sancti Bertíni Abbátis.
Toléti, in Hispánia, sanctæ Obdúliæ Vírginis.