Tértio Kaléndas Novémbris
_
In Sardínia natális sancti Pontiáni, Papæ et Mártyris, qui, ab Alexándro Imperatóre, una cum Hippólyto Presbýtero, in eam ínsulam deportátus, ibídem, mactátus fústibus, martýrium consummávit. Ejus corpus a beáto Fabiáno Papa Romam delátum est, atque in cœmetério Callísti sepúltum. Ipsíus tamen festum recólitur tertiodécimo Kaléndas Decémbris.
Ægéæ, in Cilícia, pássio sanctórum Zenóbii Epíscopi, et Zenóbiæ soróris, sub Diocletiáno Imperatóre et Lýsia Prǽside.
Altíni, in Venetórum fínibus, sancti Theonésti, Epíscopi et Mártyris, qui ab Ariánis occísus est.
In Africa natális sanctórum Mártyrum ducentórum vigínti.
Tingi, in Mauritánia, pássio sancti Marcélli Centuriónis, qui, sanctórum Cláudii ac Lupérci et Victórii Mártyrum pater, cápitis abscissióne martýrium complévit sub Agricoláo, agente vices Præfécti prætório.
Alexandríæ sanctórum trédecim Mártyrum, qui, cum sanctis Juliáno, Euno et Macário, passi sunt sub Décio Imperatóre.
Cárali, in Sardínia, sancti Saturníni Mártyris, qui, in persecutióne Diocletiáni, sub Bárbaro Prǽside, cápite truncátus est.
Apaméæ, in Phrýgia, sancti Máximi Mártyris, sub eódem Diocletiáno.
Legióne, in Hispánia, sanctórum Mártyrum Cláudii, Lupérci et Victórii, filiórum sancti Marcélli Centuriónis; qui, in persecutióne Diocletiáni et Maximiáni, sub Diogeniáno Prǽside, jussi sunt decollári.
Lutétiæ Parisiórum sancti Lucáni Mártyris.
Alexandríæ sanctæ Eutrópiæ Mártyris, quæ, Mártyres vísitans, apprehénsa est, et, cum illis sævíssime cruciáta, réddidit spíritum.
Antiochíæ sancti Serapiónis Epíscopi, eruditióne claríssimi.
Cápuæ sancti Germáni, Epíscopi et Confessóris, magnæ sanctitátis viri; cujus ánimam, in hora óbitus ejus, ab Angelis in cælum deférri sanctus Benedíctus aspéxit.
Poténtiæ, in Lucánia, sancti Gerárdi Epíscopi.