Quintodécimo Kaléndas Decémbris
_
Neocæsaréæ, in Ponto, natális sancti Gregórii, Epíscopi et Confessóris, doctrína et sanctitáte illústris, qui propter signa atque mirácula, quæ cum multa Ecclesiárum glória perpetrávit, Thaumatúrgus est appellátus.
Helpíthi, in Saxónia, item natális sanctæ Gertrúdis, Vírginis, ex Ordine sancti Benedícti, quæ dono revelatiónum clara éxstitit. Ipsíus tamen festívitas prídie hujus diéi celebrátur.
In Palæstína sanctórum Mártyrum Alphǽi et Zachǽi, qui primo anno persecutiónis Diocletiáni, post multa torménta, capitálem senténtiam subiére.
Córdubæ, in Hispánia, sanctórum Mártyrum Acíscli et Victóriæ germanórum, qui, in eádem persecutióne, Diónis Prǽsidis jussu sævíssime cruciáti sunt, et illústri passióne corónas a Dómino meruérunt.
Alexandríæ sancti Dionýsii Epíscopi, summæ eruditiónis viri, qui, multis confessiónibus clarus et pro passiónum tormentorúmque diversitáte magníficus, plenus diérum Conféssor quiévit, Valeriáni et Galliéni Imperatórum tempóribus.
Aureliánis, in Gállia, sancti Aniáni Epíscopi, cujus mortem in conspéctu Dómini pretiósam mirácula crebra testántur.
In Británnia sancti Hugónis Epíscopi, qui, ex Mónacho Carthusiáno ad Ecclésiam Lincolniénsem regéndam vocátus, multis cláruit miráculis, et sancto fine quiévit.
Turónis, in Gállia, sancti Gregórii Epíscopi.
Floréntiæ sancti Eugénii Confessóris, qui fuit Diáconus beáti Zenóbii, ejúsdem civitátis Epíscopi.