Prídie Kaléndas Januárii
_
Romæ natális sancti Silvéstri Primi, Papæ et Confessóris; qui Magnum Constantínum Imperatórem baptizávit, et Nicǽnam confirmávit Sýnodum, ac, multis áliis rebus sanctíssime gestis, quiévit in pace.
Item Romæ, via Salária, in cœmetério Priscíllæ, sanctárum Mártyrum Donátæ, Paulínæ, Rústicæ, Nominándæ, Serótinæ, Hiláriæ et Sociárum.
Apud Sénonas beatórum Sabiniáni Epíscopi, et Potentiáni; qui, a Pontífice Románo illuc ad prædicándum dirécti, confessiónis suæ martýrio eándem metrópolim illustrárunt.
Cátanæ, in Sicília, pássio sanctórum Stéphani, Pontiáni, Attali, Fabiáni, Cornélii, Sexti, Floris, Quinctiáni, Minervíni et Simpliciáni.
Apud Sénonas sanctæ Colúmbæ, Vírginis et Mártyris; quæ, igne superáto, in persecutióne Aureliáni Imperatóris, gládio cæsa est.
Eódem die sancti Zótici, Presbýteri Románi; qui, Constantinópolim proféctus, illic alendórum orphanórum curam suscépit.
Ravénnæ sancti Barbatiáni, Presbýteri et Confessóris.
In pago Lalovésci, diœcésis Viennénsis, in Delphinátu, deposítio sancti Joánnis-Francísci Regis, Sacerdótis e Societáte Jesu et Confessóris, exímiæ in salúte animárum procuránda caritátis et patiéntiæ viri; quem Clemens Papa Duodécimus in Sanctórum cánonem rétulit.
Rhætiáriæ sancti Hermétis Exorcístæ.
Lutétiæ Parisiórum sanctæ Catharínæ Labouré, Vírginis, e Societáte Puellárum Caritátis, quæ a Deípara Immaculáta singulári manifestatióne Sacri Numismátis donáta, virtútibus et miráculis insígnis éxstitit, et a Pio Papa Duodécimo in sanctárum Vírginum númerum reláta est.
Eódem die sanctæ Melániæ junióris, quæ, cum viro suo Piniáno, ex urbe Roma discéssit, et Hierosólymam profécta est; ibíque ipsa inter féminas Deo sacras et vir inter Mónachos religiósam vitam exércuit, et ambo sancto fine quievérunt.