Septimo Idus Januarii
_
Relatio pueri Jesu de Aegypto. 
Nicomediae natalis beati Luciani, Ecclesiae Antiochenae Presbyteri et Martyris; qui, satis clarus doctrina et eloquentia, passus est, ob Christi confessionem, in persecutione Galerii Maximiani, sepultusque est Helenopoli, in Bithynia. Ipsius autem laudes sanctus Joannes Chrysostomus celebravit.
Antiochiae sancti Cleri Diaconi, qui pro confessionis gloria, septies tortus ac diu maceratus in carcere, ad ultimum, gladio decollatus, martyrium consummavit.
In civitate Heraclea sanctorum Martyrum Felicis et Januarii.
Eodem die sancti Juliani Martyris.
In Dania sancti Canuti, Regis et Martyris.
Papiae sancti Crispini, Episcopi et Confessoris.
In Dacia sancti Nicetae Episcopi, qui feras et barbaras gentes, Evangelii praedicatione, mites reddidit ac mansuetas.
In Aegypto beati Theodori Monachi, qui, tempore Constantini Magni, floruit sanctitate; cujus meminit sanctus Athanasius in vita sancti Antonii.