Decimo Kalendas Aprilis
_
In Africa sanctorum Martyrum Victoriani, Proconsulis Carthaginis, et duorum germanorum, Aquisregensium; item Frumentii et alterius Frumentii, mercatorum. Hi omnes, in persecutione Wandalica (ut scribit Victor, Africanus Episcopus), sub Ariano Rege Hunnerico, pro constantia catholicae confessionis, immanissimis suppliciis cruciati, egregie coronati sunt.
Item in Africa sancti Fidelis Martyris.
Ibidem sancti Felicis et aliorum viginti Martyrum.
Caesareae, in Palaestina, sanctorum Martyrum Niconis et aliorum nonaginta novem.
Item coronae sanctorum Martyrum Domitii, Pelagiae, Aquilae, Eparchii et Theodosiae.
Antiochiae sancti Theoduli Presbyteri.
Caesareae sancti Juliani Confessoris.
In Campania sancti Benedicti Monachi, qui, a Gothis in ardenti clibano inclusus, sequenti die inventus est illaesus.