Kaléndis Januárii
_
Circumcísio Dómini nostri Jesu Chrísti, et Octáva Nativitátis ejúsdem.
Romæ pássio sanctæ Martínæ, Vírginis et Mártyris; quæ, sub Alexándro Imperatóre, divérsis tormentórum genéribus cruciáta, tandem, gládio percússa, martýrii palmam adépta est. Ipsíus vero festum tértio Kaléndas Februárii recólitur.
Cæsaréæ, in Cappadócia, deposítio sancti Basilíi, cognoménto Magni, Epíscopi, Confessóris et Ecclésiæ Doctóris; qui, témpore Valéntis Imperatóris, doctrína et sapiéntia insignítus omnibúsque virtútibus exornátus, mirabíliter effúlsit, et Ecclésiam advérsus Ariános et Macedoniános inexpugnábili constántia deféndit. Ejus autem festívitas potíssimum ágitur décimo octávo Kaléndas Júlii, quo die Epíscopus ordinátus est.
Apud montem Senárium, in Etrúria, natális sancti Bonfílii Confessóris, e septem Fundatóribus Ordinis Servórum beátæ Maríæ Vírginis, quam cum idem impénse coluísset, ab ipsa in cælum repénte evocátus est. Illíus porro ac Sociórum festum prídie Idus Februárii celebrátur.
Romæ sancti Almáchii Mártyris, qui, cum díceret: «Hodie Octavæ Domínici diéi sunt, cessáte a superstitiónibus idolórum et a sacrifíciis pollútis,» proptérea, jubénte Præfécto Urbis Alípio, a gladiatóribus occísus est.
Item Romæ, via Appia, corónæ sanctórum mílitum trigínta Mártyrum, sub Diocletiáno Imperatóre.
Apud Spolétum sancti Concórdii, Presbýteri et Mártyris; qui, tempóribus Antoníni Imperatóris, primo cæsus fústibus, dehinc equúleo suspénsus, ac póstea macerátus in cárcere, ibíque Angélica visitatióne confortátus, demum gládio vitam finívit.
Eódem die sancti Magni Mártyris.
In Africa beáti Fulgéntii, Ruspénsis Ecclésiæ Epíscopi, qui, témpore Wandálicæ persecutiónis, ob cathólicam fidem eximiámque doctrínam, ab Ariánis multa perpéssus et in Sardíniam relegátus est; atque tandem, ad própriam Ecclésiam redíre permíssus, vita et verbo clarus, sancto fine quiévit.
Teáte, in Aprútio citerióre, natális sancti Justíni, ejúsdem civitátis Epíscopi, sanctitáte vitæ ac miráculis clari.
In território Lugdunénsi, monastério Jurénsium, sancti Eugéndi Abbátis, cujus vita virtútibus et miráculis plena refúlsit.
Apud Silviníacum, in Gállia, sancti Odilónis, Abbátis Cluniacénsis, qui primus Commemoratiónem ómnium Fidélium Defunctórum, prima die post festum ómnium Sanctórum, in suis monastériis fíeri præcépit; quem ritum póstea universális Ecclésia recípiens comprobávit.
Romæ natális sancti Vincéntii Maríæ Strambi, Epíscopi Maceraténsis et Tolentíni, Congregatiónis a Cruce et Passióne Jesu sodális, pastoráli zelo præclári, quem Pius Papa Duodécimus inter Sanctos rétulit.
Alexandríæ deposítio sanctæ Euphrósynæ Vírginis, quæ in monastério virtúte abstinéntiæ ac miráculis cláruit.