Quarto Nonas Januárii
_
Romæ commemorátio plurimórum sanctórum Mártyrum, qui, spreto Diocletiáni Imperatóris edícto quo tradi sacri Códices jubebántur, pótius córpora carnifícibus quam sancta dare cánibus maluérunt.
Antiochíæ pássio beáti Isidóri Epíscopi.
Tomis, in Ponto, sanctórum fratrum Argéi, Narcíssi et Marcellíni púeri. Hic, sub Licínio Príncipe, cum inter tirónes esset comprehénsus et nollet militáre, hinc, cæsus ad mortem ac diu macerátus in cárcere, demum, in mare demérsus, martýrium consummávit; ejus autem fratres gládio perémpti sunt.
Medioláni sancti Martiniáni Epíscopi.
Nítriæ, in Ægýpto, beáti Isidóri, Epíscopi et Confessóris.
Ipso die sancti Siridiónis Epíscopi.
In Thebáide sancti Macárii Alexandríni, Presbýteri et Abbátis.