Séptimo Idus Januárii
_
Relátio púeri Jesu de Ægýpto.
Nicomédiæ natális beáti Luciáni, Ecclésiæ Antiochénæ Presbýteri et Mártyris; qui, satis clarus doctrína et eloquéntia, passus est, ob Christi confessiónem, in persecutióne Galérii Maximiáni, sepultúsque est Helenópoli, in Bithýnia. Ipsíus autem laudes sanctus Joánnes Chrysóstomus celebrávit.
Antiochíæ sancti Cleri Diáconi, qui pro confessiónis glória, sépties tortus ac diu macerátus in cárcere, ad últimum, gládio decollátus, martýrium consummávit.
In civitáte Heracléa sanctórum Mártyrum Felícis et Januárii.
Eódem die sancti Juliáni Mártyris.
In Dánia sancti Canúti, Regis et Mártyris.
Pápiæ sancti Crispíni, Epíscopi et Confessóris.
In Dácia sancti Nicetæ Epíscopi, qui feras et bárbaras gentes, Evangélii prædicatióne, mites réddidit ac mansuétas.
In Ægýpto beáti Theodóri Mónachi, qui, témpore Constantíni Magni, flóruit sanctitáte; cujus méminit sanctus Athanásius in vita sancti Antónii.