Sextodécimo Kaléndas Februárii
_
In Thebáide sancti Antónii Abbátis, qui, multórum Monachórum Pater, vita et miráculis præclaríssimus vixit; cujus gesta sanctus Athanásius insígni volúmine prosecútus est. Ejus autem sacrum corpus, sub Justiniáno Imperatóre, divína revelatióne repértum et Alexandríam delátum, in Ecclésia sancti Joánnis Baptístæ humátum fuit.
Apud Língonas, in Gállia, sanctórum tergeminórum Speusíppi, Eleusíppi et Meleusíppi; qui, cum ávia sua Leonílla, martýrio coronáti sunt, témpore Marci Aurélii Imperatóris.
Apud Bitúricas, in Aquitánia, deposítio sancti Sulpícii Epíscopi, cognoménto Pii, cujus vita et mors pretiósa gloriósis miráculis commendátur.
Romæ, in monastério sancti Andréæ, beátorum Monachórum Antónii, Méruli et Joánnis, de quibus scribit sanctus Gregórius Papa.
In fínibus Edessénæ regiónis, in Mesopotámia, sancti Juliáni Eremítæ, cognoménto Sabæ, qui, Valéntis Imperatóris témpore, fidem cathólicam, Antiochíæ ferme collápsam, virtúte miraculórum eréxit.
Romæ Invéntio sanctórum Mártyrum Diodóri Presbýteri, Mariáni Diáconi, et Sociórum, qui, sancto Stéphano Papa Ecclésiam Dei regénte, martýrium Kaléndis Decémbris sunt assecúti.