Duodécimo Kaléndas Februárii
_
Romæ pássio sanctæ Agnétis, Vírginis et Mártyris; quæ, sub Præfécto Urbis Symphrónio, ígnibus injécta, sed iis per oratiónem ejus exstínctis, gládio percússa est. De ea beátus Hierónymus hæc scribit: « Omnium géntium lítteris atque linguis, præcípue in Ecclésiis, Agnétis vita laudáta est; quæ et ætátem vicit et tyránnum, et títulum castitátis martýrio consecrávit ».
Athénis natális sancti Públii Epíscopi, qui Atheniénsium Ecclésiam, post sanctum Dionýsium Areopagítam, nobíliter rexit; et, præclárus virtútibus ac doctrínæ laude præfúlgens, ob Christi martýrium glorióse coronátur.
Tarracóne, in Hispánia, sanctórum Mártyrum Fructuósi Epíscopi, Augúrii et Eulógii Diaconórum. Hi, témpore Galliéni, primo in cárcerem trusi, deínde flammis injécti, et, exústis vínculis, mánibus in modum crucis expánsis orántes, martýrium complevérunt; in quorum die natáli sanctus Augustínus sermónem ad pópulum hábuit.
In monastério Einsidlénsi, apud Helvétios, sancti Meinrádi, Presbýteri et Mónachi; qui eódem in loco, ubi póstea monastérium ipsum excrévit, eremíticæ inténtus vitæ, a latrónibus interféctus est. Ipsíus vero beáti viri corpus, olim in Augiénsi Germániæ monastério sepúltum, ad Einsidlénse monastérium deínde relátum fuit.
Trecis, in Gállia, sancti Pátrocli Mártyris, qui martýrii corónam sub Aureliáno Imperatóre proméruit.
Pápiæ sancti Epiphánii, Epíscopi et Confessóris.