Quarto Nonas Februárii
_
Purificátio beátæ Maríæ Vírginis, quæ a Græcis Hypapánte Dómini appellátur.
Cæsaréæ, in Palæstína, sancti Cornélii Centuriónis, quem beátus Petrus Apóstolus baptizávit, et apud præfátam urbem Episcopáli sublimávit honóre.
Romæ, via Salária, pássio sancti Aproniáni Commentariénsis, qui, adhuc Gentílis, cum sanctum Sisínium e cárcere edúceret ut Laodício Præfécto præsentáret, vocémque de calo factam audíret: « Veníte, benedícti Patris mei, percípite regnum, quod vobis parátum est a constitutióne mundi », credens baptizátur, et póstea, in confessióne Dómini, vitæ finem senténtia capitáli accépit.
Item Romæ sanctórum Mártyrum Fortunáti, Feliciáni, Firmi et Cándidi.
Aureliánis, in Gállia, sancti Flósculi Epíscopi.
Cantuáriæ, in Anglia, natális sancti Lauréntii Epíscopi, qui, post sanctum Augustínum, eam Ecclésiam gubernávit, et Regem ipsum ad fidem convértit.
Prati, in Etrúria, sanctæ Catharínæ de Rícciis, Vírginis Floréntinæ, ex Ordine Prædicatórum, ob cæléstium donórum cópiam insígnis; quam Benedíctus Décimus quartus, Póntifex Máximus, sanctárum Vírginum fastis adscrípsit.
Burdígalæ sanctæ Joánnæ de Lestonnác, Víduæ, Institúti Filiárum beátæ Vírginis Maríæ Fundatrícis, caritátis stúdio ac puellárum instituendárum cura insígnis, quam Pius Papa Duodécimus Sanctárum número accénsuit.