Idibus Februárii
_
Antiochíæ natális sancti Agábi Prophétæ, de quo beátus Lucas in Actibus Apostólicis scribit.
Tudérti, in Umbria, sancti Benígni, Presbýteri et Mártyris; qui, Diocletiáni et Maximiáni Imperatórum témpore, cum fidem Christiánam verbo et exémplo propagáre non desísteret, ab idolórum cultóribus captus est, ac, váriis afféctus supplíciis, sacerdotále munus honóre martýrii cumulávit.
Melitínæ, in Arménia, sancti Polyeúcti Mártyris, qui, in persecutióne Décii, multa passus, martýrii corónam adéptus est.
Lugdúni, in Gállia, sancti Juliáni Mártyris.
Ravénnæ sanctárum Fuscæ Vírginis, ejúsque nutrícis Mauræ, quæ, Décio imperánte, multa sub Quinctiáno Prǽside perpéssæ, demum gládio transfíxæ, martýrium consummárunt.
Lugdúni, in Gállia, sancti Stéphani, Epíscopi et Confessóris.
Reáte sancti Stéphani Abbátis, miræ patiéntiæ viri; in cujus tránsitu (ut refert beátus Gregórius Papa) sancti Angeli, céteris étiam vidéntibus, adfuérunt.