Kaléndis Mártii
_
Romæ sanctórum Mártyrum ducentórum sexagínta, quos jussit primo Cláudius, pro Christi nómine damnátos, extra portam Saláriam arénam fódere, deínde in amphitheátro sagíttis mílitum intérfici.
Item natális sanctórum Mártyrum Leónis, Donáti, Abundántii, Nicéphori et aliórum novem.
Massíliæ, in Gállia, sanctórum Mártyrum Hermétis et Hadriáni.
Heliópoli, apud Líbanum, sanctæ Eudóciæ Mártyris, quæ, in persecutióne Trajáni, a Theódoto Epíscopo baptizáta et ad certámen muníta, ibídem, Vincéntii Prǽsidis jussu percússa gládio, martýrii corónam accépit.
Eódem die sanctæ Antonínæ Mártyris, quæ in persecutióne Diocletiáni, cum Gentílium deos irrisísset, ídeo, post vários cruciátus, in vase quodam inclúsa, in palúdem urbis Ceæ demérsa est.
Romæ natális sancti Felícis Papæ Tértii, qui sancti Gregórii Magni átavus fuit; qui étiam (ut ipse Gregórius refert), sanctæ Tharsíllæ nepti appárens, illam ad cæléstia regna vocávit.
Apud civitátem Werdam sancti Suitbérti Epíscopi, qui, témpore sancti Sérgii Papæ Primi, apud Frísones, Bátavos et álios Germániæ pópulos Evangélium prædicávit.
Andégavi, in Gállia, sancti Albíni, Epíscopi et Confessóris, viri præclaríssimæ virtútis et sanctitátis.
Apud Cenómanos, in Gállia, sancti Siviárdi Abbátis.
Perúsiæ Translátio sancti Herculáni, Epíscopi et Mártyris, qui jussu Totílæ, Gothórum Regis, decollátus est. Ipsíus autem corpus ita cápiti unítum atque sanum, quadragésimo post abscissiónem die (ut scribit sanctus Gregórius Papa), repértum est, ac si nulla ferri incísio illud tetigísset.