Décimo Kaléndas Aprílis
_
In Africa sanctórum Mártyrum Victoriáni, Procónsulis Cartháginis, et duórum germanórum, Aquisregénsium; item Fruméntii et altérius Fruméntii, mercatórum. Hi omnes, in persecutióne Wandálica (ut scribit Victor, Africánus Epíscopus), sub Ariáno Rege Hunneríco, pro constántia cathólicæ confessiónis, immaníssimis supplíciis cruciáti, egrégie coronáti sunt.
Item in Africa sancti Fidélis Mártyris.
Ibídem sancti Felícis et aliórum vigínti Mártyrum.
Cæsaréæ, in Palæstína, sanctórum Mártyrum Nicónis et aliórum nonagínta novem.
Item corónæ sanctórum Mártyrum Domítii, Pelágiæ, Aquilæ, Epárchii et Theodósiæ.
Limæ, in Perúvia, sancti Turíbii Epíscopi, cujus virtúte fides et disciplína ecclesiástica per Amerícam diffúsæ sunt.
Antiochíæ sancti Theodúli Presbýteri.
Barcinóne, in Hispánia, sancti Joséphi Oriol Presbýteri, Ecclésiæ sanctæ Maríæ Regum Beneficiárii, omnígena virtúte ac præsértim córporis afflictatióne, paupertátis cultu atque in egénos et infírmos caritáte célebris; quem, in vita et post mortem miráculis gloriósum, Pius Papa Décimus in Sanctórum número recénsuit.
Cæsaréæ sancti Juliáni Confessóris.
In Campánia sancti Benedícti Mónachi, qui, a Gothis in ardénti clíbano inclúsus, sequénti die invéntus est illǽsus.