Octávo Kaléndas Aprílis
_
Annuntiátio beatíssimæ Vírginis Genitrícis Dei Maríæ. 
Hierosólymis commemorátio sancti Latrónis, qui, in cruce Christum conféssus, ab eo méruit audíre: « Hódie mecum eris in paradíso ».
Romæ sancti Quiríni Mártyris, qui, sub Cláudio Imperatóre, post facultátum amissiónem, post cárceris squalórem, post multórum vérberum afflictiónem, gládio interféctus est et in Tíberim projéctus; quem Christiáni, cum in ínsula Lycaónia (quæ póstea sancti Bartholomǽi dicta est) inveníssent, in cœmetério Pontiáni condidérunt.
Item Romæ sanctórum ducentórum sexagínta duórum Mártyrum.
Sírmii pássio sancti Irenǽi, Epíscopi et Mártyris; qui, témpore Maximiáni Imperatóris, sub Prǽside Probo, primum torméntis acérrimis vexátus, deínde diébus plúrimis cruciátus in cárcere, novíssime, abscísso cápite, consummátus est.
Nicomedíæ sanctæ Dulæ, cujúsdam mílitis ancíllæ, quæ, ob castitátem servándam occísa, martýrii corónam proméruit.
Laodicéæ, ad Líbanum, sancti Pelágii Epíscopi, qui, ob fidem cathólicam, témpore Valéntis, exsílium et ália passus est; ac tandem, in sedem suam restitútus, quiévit in Dómino.
In Antro, ínsula Lígeris flúminis, sancti Hermelándi Abbátis, cujus gloriósa conversátio insígni miraculórum præcónio commendátur.
Pistórii, in Túscia, sanctórum Confessórum Baróntii et Desidérii.
Faliscodúni sanctæ Lúciæ Filippíni, Fundatrícis Institúti Magistrárum Piárum ab ejus cognómine nuncupatárum, de Christiána puellárum et mulíerum, præsértim páuperum, eruditióne óptime méritæ, quam Pius Papa Undécimus inter sanctas Vírgines rétulit.