Séptimo Kaléndas Aprílis
_
Romæ, via Lavicána, sancti Cástuli Mártyris, qui, cum esset zetárius Palátii et hospes Sanctórum, a persecutóribus tértio appénsus, tértio audítus, et, in confessióne Dómini persevérans, missus est in fóveam, ac, dimíssa super eum massa arenária, martýrio coronátus est.
Item Romæ corónæ sanctórum Mártyrum Petri, Marciáni, Jovíni, Theclæ, Cassiáni et aliórum.
Pentápoli, in Líbya, natális sanctórum Mártyrum Theodóri Epíscopi, Irenǽi Diáconi, Serapiónis et Ammónii Lectórum.
Sírmii sanctórum Mártyrum Montáni Presbýteri, et Máximæ, qui, ob Christi fidem, in flumen demérsi sunt.
Item sanctórum Mártyrum Quadráti, Theodósii, Emmanuélis et aliórum quadragínta.
Alexandríæ sanctórum Mártyrum Eutýchii et aliórum; qui, Constántii témpore, sub Ariáno Epíscopo Geórgio, pro fide cathólica gládio cæsi sunt.
Eódem die sancti Ludgéri, Epíscopi Monasteriénsis, qui Saxonibus Evangélium prædicávit.
Cæsaraugústæ, in Hispánia, sancti Bráulii, Epíscopi et Confessóris.
Tréviris sancti Felícis Epíscopi.