Prídie Nonas Aprílis
_
Híspali, in Hispánia, sancti Isidóri Epíscopi, Confessóris et Ecclésiæ Doctóris, sanctitáte et doctrína conspícui; qui zelo cathólicæ fídei et ecclesiásticæ observántia disciplínæ Hispánias illustrávit.
Medioláni deposítio sancti Ambrósii Epíscopi, Confessóris et Ecclésiæ Doctóris; cujus stúdio, inter cétera doctrínæ et miraculórum insígnia, témpore Ariánæ perfídiæ, tota fere Itália ad cathólicam fidem convérsa est. Ipsíus tamen festívitas séptimo Idus Decémbris potíssimum recólitur, quo die Epíscopus Mediolanénsis ordinátus est.
Thessalonícæ sanctórum Mártyrum Agathópodis Diáconi, et Theodúli Lectóris, qui, sub Maximiáno Imperatóre et Faustíno Prǽside, ob Christiánæ fídei confessiónem, in mare, alligáto ad collum saxo, demérsi sunt.
Constantinópoli sancti Platónis Mónachi, qui plúribus annis advérsus hæréticos, sanctárum Imáginum effractóres, invicto ánimo decertávit.
In Palæstína sancti Zósimi Anachorétæ, qui funus sanctæ Maríæ Ægyptíacæ curávit.
Panórmi sancti Benedícti a sancto Philadélpho, ob córporis nigrédinem cognoménto Nigri, ex Ordine Minórum, Confessóris, qui, signis et virtútibus clarus, in Dómino quiévit, et a Pio Séptimo, Pontífice Máximo, in Sanctórum númerum relátus est.