Nonis Aprílis
_
Venétiæ, in Británnia minóre, sancti Vincéntii, cognoménto Ferrérii, ex Ordine Prædicatórum, Confessóris, qui, potens ópere et sermóne, multa míllia infidélium convértit ad Christum.
In Africa pássio sanctórum Mártyrum, qui, in persecutióne Regis Ariáni Genseríci, in die Paschæ, in Ecclésia cæsi sunt; quorum Lector, dum in púlpito «Alle​lúja» cantáret, sagítta in gútture transfíxus est.
Eódem die sancti Zenónis Mártyris, qui, pice íllitus et in ignem conjéctus, et hasta in médio rogo vulnerátus, martýrio coronátus est.
In Lesbo ínsula pássio sanctárum quinque Vírginum, quæ gládio martýrium consummárunt.
Thessalonícæ sanctæ Irénes Vírginis, quæ, cum sacros Libros contra Diocletiáni edíctum occultásset, ídeo, post tolerántiam cárceris, sagítta percússa est et igne cremáta, jussu Dulcétii Prǽsidis; sub quo et soróres ejus simul Agape et Chiónia passæ ántea fúerant.
Palmæ, in ínsula Majórica, sanctæ Catharínæ Thomas, Vírginis, Canoníssæ Reguláris ex Ordine sancti Augustíni, quam Pius Papa Undécimus in sanctárum Vírginum númerum rétulit.