Quinto Kaléndas Maji
_
Sancti Petri Canísii, Sacerdótis e Societáte Jesu et Confessóris atque Ecclésiæ Doctóris; qui duodécimo Kaléndas Januárii migrávit ad Dóminum.
Nicomedíæ natális sancti Anthimi, Epíscopi et Mártyris; qui in persecutióne Diocletiáni, ob confessiónem Christi, martýrii glóriam obtruncatióne cápitis accépit. Secúta est quoque illum univérsa ferme gregis sui multitúdo; quorum álios Judex gládio obtruncári, álios conflagrári ígnibus, álios, navículis impósitos, pélago immérgi fecit.
Tarsi, in Cilícia, sanctórum Castóris et Stéphani Mártyrum.
Bonóniæ sancti Tertulliáni, Epíscopi et Confessóris.
Bríxiæ sancti Theóphili Epíscopi.
In Ægýpto sancti Theodóri Abbátis, qui fuit discípulus sancti Pachómii.
Constantinópoli sancti Joánnis Abbátis, qui pro cultu sacrárum Imáginum, sub Leóne Isáurico, plúrimum decertávit.
Tarracóne, in Hispánia, beáti Petri Armengáudii, ex Ordine beátæ Maríæ de Mercéde redemptiónis captivórum; qui, multa pro fidélibus rediméndis in Africa passus, tandem, in convéntu sanctæ Maríæ Pratórum, beáto fine quiévit.
Lucæ, in Túscia, beátæ Zitæ Vírginis, virtútum et miraculórum fama conspícuæ.