Prídie Kaléndas Júnii
_
Festum beátæ Maríæ Vírginis Regínæ. 
Romæ sanctæ Petroníllæ Vírginis, fíliæ beáti Petri Apóstoli, quæ, conjúgium nóbilis viri Flacci spernens, et, accéptis triduánis ad deliberándum indúciis, ínterim jejúniis et oratiónibus vacans, tértia die, mox ut Christi Sacraméntum accépit, emísit spíritum.
Aquiléjæ sanctórum Mártyrum fratrum Cántii, Cantiáni et Cantianíllæ, qui, cum essent ex illústri Aniciórum progénie, sub Diocletiáno et Maximiáno Imperatóribus, ob Christiánæ fídei constántiam, una cum pædagógo suo Proto, cápite plexi sunt.
Túrribus, in Sardínia, sancti Crescentiáni Mártyris.
Apud Comános, in Ponto, sancti Hérmiæ mílitis, qui, sub Antoníno Imperatóre, de innúmeris et sævíssimis torméntis divína ope liberátus, carníficem convértit ad Christum, et ejúsdem martýrii corónæ partícipem fecit; quam tamen ipse primus, gládio obtruncátus, accépit.
Verónæ sancti Lupicíni Epíscopi.
Romæ sancti Paschásii, Diáconi et Confessóris, cujus méminit beátus Gregórius Papa.