Undécimo Kaléndas Júlii
_
Romæ sancti Aloísii Gonzágæ, Clérici e Societáte Jesu et Confessóris, principátus contémptu et innocéntia vitæ claríssimi, quem, a Summo Pontífice Benedícto Décimo tértio adscríptum Sanctórum fastis et Protectórem juvénibus præsértim studiósis datum, Pius Papa Undécimus cæléstem Christiánæ juventútis univérsæ Patrónum confirmávit solémniter atque íterum declarávit.
Item Romæ sanctæ Demétriæ Vírginis, quæ, sanctórum Mártyrum Flaviáni et Dafrósæ fília ac sanctæ Vírginis et Mártyris Bibiánæ soror, ipsa quoque, sub Juliáno Apóstata, martýrio coronáta est.
Eódem die sancti Eusébii, Samosaténi Epíscopi; qui, témpore Constántii, Imperatóris Ariáni, sub hábitu militári incognítus Ecclésias Dei visitábat, ut in fide cathólica illas confirmáret. Deínde, sub Valénte, in Thráciam relegátur; sed, réddita pace Ecclésiæ, témpore Theodósii, ab exsílio revocátus, tandem, cum íterum Ecclésias visitáret, ei caput, tégula per mulíerem Ariánam désuper immíssa, confráctum est, sicque Martyr occúbuit.
Icónii, in Lycaónia, sancti Teréntii, Epíscopi et Mártyris.
Syracúsis, in Sicília, natális sanctórum Mártyrum Rufíni et Martiæ.
In Africa sanctórum Mártyrum Cyríaci et Apollináris.
Mogúntiæ sancti Albáni Mártyris, qui ob Christi fidem, post longos labóres et dura certámina, factus est dignus coróna vitæ.
Pápiæ sancti Urciscéni, Epíscopi et Confessóris.
Apud Tungrénses sancti Martíni Epíscopi.
In pago Ebroicénsi sancti Leutfrídi Abbátis.