Séptimo Kaléndas Júlii
_
In território Guléti, prope Nuscum, sancti Guliélmi Confessóris, Patris Eremitárum Montis Vírginis.
Apud Beróeam natális sancti Sosípatris, qui fuit discípulus beáti Pauli Apóstoli.
Romæ sanctæ Lúciæ, Vírginis et Mártyris, cum áliis vigínti duóbus.
Alexandríæ sancti Gallicáni Mártyris, viri Consuláris, qui, sublimátus ínfulis triumphálibus et Constantíno Augústo carus, a sanctis Joánne et Paulo ad Christi fidem convérsus est; eáque suscépta, cum sancto Hilaríno secéssit ad Ostia Tiberína, atque ibi hospitalitáti et infirmórum servítio totum se dedit. Cujus rei fama in toto Orbe divulgáta, multi úndique illuc veniéntes vidébant virum ex Patrício et Cónsule laváre páuperum pedes, pónere mensam, aquam mánibus effúndere, languéntibus sollícite ministráre et cétera pietátis offícia exhibére. Ipse póstmodum, sub Juliáno Apóstata, inde expúlsus, Alexandríam perréxit; ibíque, cum a Rauciáno Júdice sacrificáre cogerétur et contémneret, ídeo, percússus gládio, Christi Martyr efféctus est.
Sibápoli, in Mesopotámia, sanctæ Febróniæ, Vírginis et Mártyris; quæ, in persecutióne Diocletiáni, sub Siléno Júdice, ob fidem et pudicítiam servándam, primo virgis cæsa et equúleo torta, deínde pectínibus laniáta atque igne succénsa, demum, excússis déntibus ac mammis pedibúsque abscíssis, cápitis damnáta, tot passiónum ornáta monílibus migrávit ad Sponsum.
Apud Rhégium sancti Prósperi Aquitáni, ejúsdem urbis Epíscopi, eruditióne ac pietáte insígnis, qui advérsus Pelagiános, pro fide cathólica, strénue decertávit.
Tauríni natális sancti Máximi, Epíscopi et Confessóris, doctrína et sanctitáte celebérrimi.
In Hollándia sancti Adelbérti Confessóris, qui fuit discípulus sancti Willibrórdi Epíscopi.