Sexto Nonas Júlii
_
Visitátio beátæ Maríæ Vírginis ad Elísabeth. 
Romæ, via Aurélia, natális sanctórum Mártyrum Procéssi et Martiniáni, qui, a beáto Petro Apóstolo in Mamertíni custódia baptizáti, et, sub Neróne, oris contusiónem, equúleum, nervos, fustes, flammas scorpionésque perpéssi, novíssime, gládio percússi, martýrio coronáti sunt.
Item Romæ pássio sanctórum trium mílitum, qui, ad Christum convérsi in martýrio beáti Pauli Apóstoli, cum eo partícipes fieri cæléstis glóriæ meruérunt.
Eódem die sanctórum Mártyrum Aristónis, Crescentiáni, Eutychiáni, Urbáni, Vitális, Justi, Felicíssimi, Felícis, Márciæ et Symphorósæ; qui omnes apud Campániam, cum Diocletiáni Imperatóris persecútio desævíret, martýrio coronáti sunt.
Wintóniæ, in Anglia, sancti Swithúni Epíscopi, cujus sánctitas miráculis effúlsit.
Bambérgæ sancti Othónis Epíscopi, qui Pomeránis Evangélium prædicávit, et eos ad fidem convértit.
Lýciis, in Apúlia, sancti Bernardíni Realíno, Confessóris, qui magistrátus múnere egrégie functus, Societátem Jesu ingréssus et sacerdótio auctus, caritáte ac miráculis incláruit.
Turónis, in Gállia, deposítio sanctæ Monegúndis, religiósæ féminæ.