Undécimo Kaléndas Augústi
_
Apud Massíliam, in Gállia, natális sanctæ Maríæ Magdalénæ, de qua Dóminus ejécit septem dæmónia, et quæ ipsum Salvatórem a mórtuis resurgéntem prima vidére méruit.
Ulyssipóne, in Lusitánia, natális sancti Lauréntii a Brundúsio, Confessóris, ex Ordine Fratrum Minórum Capuccinórum, quem verbi Dei prædicatióne, cælésti doctrína, pontificiis legatiónibus rebúsque ad Dei glóriam et Ecclésiæ utilitátem felíciter gestis præclárum, Leo Papa décimus tértius Sanctárum fastis adscrípsit, et Summus Póntifex Joánnes vigésimus tértius universális Ecclésiæ Doctórem declarávit, ejúsque festum prídie hujus diéi celebrári jussit.
Philíppis, in Macedónia, sanctæ Synthýches, cujus méminit beátus Paulus Apóstolus.
Ancýræ, in Galátia, natális sancti Platónis Mártyris, qui, sub Agrippíno Vicário, verbéribus cæsus, uncis laniátus férreis, aliísque immaníssimis tormentórum genéribus cruciátus, demum, abscísso cápite, invíctam ánimam Deo réddidit. Ipsíus vero mirácula in subveniéndis captívis, Acta secúndæ Sýnodi Nicǽnæ testántur.
In Cypro sancti Theóphili Prætóris, qui ab Arábibus tentus, et, cum nec donis nec minis flecti posset ut Christum negáret, gládio cæsus est.
Antiochíæ sancti Cyrílli Epíscopi, doctrína et sanctitáte conspícui.
Menáti, in território Arvernénsi, sancti Meneléi Abbátis.
In monastério Fontanéllæ, in Gállia, sancti Wandregísili Abbátis, miráculis clari; cujus corpus ad Blandínum monastérium, in Flándria, póstea delátum fuit.
Scythópoli, in Palæstína, sancti Joséphi Cómitis.