Sexto Kaléndas Septémbris
_
Sancti Joséphi Calasánctii, Presbýteri et Confessóris, qui Ordinis Clericórum Regulárium Páuperum Matris Dei Scholárum Piárum éxstitit Fundátor, atque octávo Kaléndas Septémbris obdormívit in Dómino.
Poténtiæ, in Lucánia, pássio sanctórum Aróntii, Honoráti, Fortunáti et Sabiniáni; qui, sanctórum Bonifátii et Theclæ fílii, a Valeriáno Júdice, sub Maximiáno Imperatóre, jussi sunt capitálem subíre senténtiam. Eórum tamen ac reliquórum ex duódecim frátribus festum Kaléndis Septémbris celebrátur.
Bérgomi sancti Narni, qui, a beáto Bárnaba baptizátus, primus ab ipso ejúsdem civitátis Epíscopus ordinátus est.
Cápuæ natális sancti Rufi, Epíscopi et Mártyris; qui, cum esset patríciæ dignitátis, a beáto Apollináre, sancti Petri discípulo, cum univérsa família baptizátus est.
Ibídem sanctórum Mártyrum Rufi et Carpóphori, qui sub Diocletiáno et Maximiáno passi sunt.
Tomis, in Ponto, sanctórum Mártyrum Marcellíni Tribúni, et uxóris Mannéæ, ac filiórum Joánnis, Serapiónis et Petri.
Apud Leontínos, in Sicília, sanctæ Euthalíæ Vírginis, quæ, cum esset Christiána, ad cæléstem Sponsum, a fratre suo Sermiliáno cæsa gládio, migrávit.
Eódem die pássio sanctæ Anthúsæ junióris, quæ ob Christi fidem, in púteum mersa, martýrium sumpsit.
Areláte, in Gállia, sancti Cæsárii Epíscopi, miræ sanctitátis et pietátis viri.
Augustodúni sancti Syágrii, Epíscopi et Confessóris.
Papíæ sancti Joánnis Epíscopi.
Ilérdæ, in Hispánia Tarraconénsi, sancti Licérii Epíscopi.
In Thebáide sancti Póemenis Anachorétæ.
Apud Septempedános, in Picéno, sanctæ Margarítæ Víduæ.