Quinto Idus Septémbris
_
Nicomedíæ pássio sanctórum Mártyrum Doróthei et Gorgónii, qui, cum essent apud Diocletiánum Augústum honóres amplíssimos consecúti, et persecutiónem, quam ille Christiánis inferébat, detestaréntur, præsénte eo, jussi sunt primo appéndi, et flagris toto córpore laniári; deínde, viscéribus pelle nudátis, acéto et sale perfúndi, sicque assári in cratícula; atque, ad últimum, láqueo necári. Interjécto autem témpore, beáti Gorgónii corpus Romam delátum fuit, ac via Latína pósitum, et inde ad Basílicam sancti Petri translátum.
In Sabínis, trigésimo ab Urbe milliário, sanctórum Mártyrum Hyacínthi, Alexándri et Tibúrtii.
Sebáste, in Arménia, sancti Severiáni, qui, cum Licínii Imperatóris esset miles, et Quadragínta Mártyres, in cárcere deténtos frequens visitáret, hinc, jussu Lýsiæ Prǽsidis, saxo ad pedes ligáto suspénsus est, ac, verbéribus cæsus et flagris laniátus, in torméntis réddidit spíritum.
Eódem die pássio sancti Stratónis, qui pro Christo, ad duas árbores ligátus atque discérptus, martýrium consummávit.
Item sanctórum Mártyrum Rufíni et Rufiniáni fratrum.
In território Tarvanénsi, in Gállia, sancti Audomári Epíscopi.
In monastério Cluanénsi, in Hibérnia, sancti Queráni, Presbýteri et Abbátis.