Quarto Idus Septémbris
_
Tolentíni, in Picéno, deposítio sancti Nicolái Confessóris, ex Ordine Eremitárum sancti Augustíni. 
In Africa natális sanctórum Episcopórum Nemesiáni, Felícis, Lúcii, altérius item Felícis, Littéi, Polyáni, Victóris, Jadéris, Datívi et aliórum; qui, sub Valeriáno et Galliéno, exsurgénte persecutiónis rábie, ad primam confessiónis Christi constántiam gráviter fústibus cæsi sunt, deínde, compédibus vincti et ad fodiénda metálla deputáti, gloriósæ confessiónis agónem consummárunt.
Leódii, in Bélgio, sancti Theodárdi, Epíscopi et Mártyris; qui ánimam suam pósuit pro óvibus suis, et miraculórum signis post mortem illúxit.
Chalcedóne sanctórum Mártyrum Sósthenis et Victóris, qui, in persecutióne Diocletiáni, sub Asiæ Procónsule Prisco, post víncula et béstias superátas, jussi sunt incéndi; at illi, salutántes se ínvicem in ósculo sancto, in oratióne pósiti emisérunt spíritum.
Item sanctórum Mártyrum Apéllii, Lucæ et Cleméntis.
In Bithýnia sanctárum Vírginum sorórum Menodóræ, Metrodóræ et Nymphodóræ; quæ sub Maximiáno Imperatóre et Frontóne Prǽside, ob intrépidam in Christi fide constántiam martýrio coronátæ, pervenérunt ad glóriam.
Compostéllæ sancti Petri Epíscopi, qui multis virtútibus et miráculis cláruit.
In civitáte Albigénsi, in Gállia, sancti Sálvii, Epíscopi et Confessóris.
Nováriæ sancti Agápii Epíscopi.
Constantinópoli sanctæ Pulchériæ Augústæ, Vírginis, religióne et pietáte insígnis.
Neápoli, in Campánia, sanctæ Cándidæ junióris, miráculis claræ.