Duodécimo Kaléndas Octóbris
_
Romæ pássio sanctórum Mártyrum Eustáchii et Theopístis uxóris, cum duóbus fíliis Agapíto et Theopísto, qui, sub Hadriáno Imperatóre, damnáti ad béstias, sed Dei ope ab iis nullátenus læsi, tandem, in bovem ǽneum candéntem inclúsi, martýrium consummárunt.
Cýzici, in Propóntide, natális sanctórum Mártyrum Faustæ Vírginis, et Evilásii, sub Maximiáno Imperatóre; e quibus Fausta, ab eódem Evilásio, idolórum sacerdóte, decalváta et ad turpitúdinem rasa, suspénsa et torta est. Deínde, cum eam vellet médiam secáre, et carnífices lǽdere non valérent, stupens crédidit in Christum Evilásius; et, dum ipse quoque, Imperatóris jussu, fórtiter torquerétur, Fausta, cápite terebráta, clavis toto córpore confíxa et sartágini ignítæ impósita, tandem, cum eódem Evilásio, illam voce de cælis vocánte, transívit ad Dóminum.
In Phrýgia sanctórum Mártyrum Dionýsii et Priváti.
Item sancti Prisci Mártyris, qui, punctim pugiónibus transverberátus, cápite plexus est.
Perge, in Pamphýlia, sanctórum Theodóri, et Philíppæ matris, ac Sociórum Mártyrum, sub Antoníno Imperatóre.
Carthágine sanctæ Cándidæ, Vírginis et Mártyris; quæ, sub Maximiáno Imperatóre, plagis toto córpore dilaceráta, martýrio coronátur.
Medioláni sancti Clicérii, Epíscopi et Confessóris.
Romæ Translátio córporis sancti Agapíti Primi, Papæ et Confessóris, ex urbe Constantinópoli, in qua Póntifex décimo Kaléndas Maji obdormíerat in Dómino.