Prídie Kaléndas Novémbris
_
Romæ sanctórum Ampliáti, Urbáni et Narcíssi, quorum méminit sanctus Paulus ad Romános scribens, qui, ob Evangélium Christi, a Judǽis et Gentílibus cæsi sunt.
Constantinópoli sancti Stachis Epíscopi, qui a beáto Andréa Apóstolo primus ejúsdem civitátis Epíscopus ordinátus est.
Apud Augústam Veromanduórum, in Gállia, sancti Quinctíni, civis Románi et ex órdine Senatório viri, qui sub Maximiáno Imperatóre martýrium passus est; cujus corpus post annos quinquagínta quinque, revelánte Angelo, invéntum est incorrúptum.
Medioláni sancti Antoníni, Epíscopi et Confessóris.
Ratisbónæ, in Bavária, sancti Wolfgángi Epíscopi.
Palmæ, in Majórca ínsula, sancti Alfónsi Rodríguez, Coadjutóris temporális formáti e Societáte Jesu et Confessóris, humilitáte ac jugi mortificatiónis stúdio insígnis; quem Leo Décimus tértius, Póntifex Máximus, Sanctórum fastis adscrípsit.
Romæ Translátio beáti Nemésii Diáconi, et fíliæ Lucíllæ Vírginis, qui octávo Kaléndas Septémbris decolláti sunt.