Octávo Kaléndas Decémbris
_
Sancti Joánnis a Cruce Presbýteri, Confessóris et Ecclésiæ Doctóris, sanctæ Terésiæ in Carmelitárum reformatióne sócii, cujus dies natális décimo nono Kaléndas Januárii recensétur.
Eódem die natális sancti Chrysógoni Mártyris, qui, post longa víncula et cárceres pro constantíssima Christi confessióne tolerátos, Aquiléjam, jubénte Diocletiáno, perdúctus, tandem, cæsus cápite et in mare projéctus, martýrium consummávit.
Romæ sancti Crescentiáni Mártyris, qui in passióne beáti Marcélli Papæ memorátur.
Apud Corínthum sancti Alexándri Mártyris, qui, sub Juliáno Apóstata et Sallústio Prǽside, pro Christi fide certávit usque ad mortem.
Perúsiæ sancti Felicíssimi Mártyris.
Amériæ, in Umbria, sanctæ Firmínæ, Vírginis et Mártyris; quæ, in persecutióne Diocletiáni Imperatóris, várie cruciáta est, ac demum, suspénsa et lampádibus ardéntibus adústa, immaculátum spíritum Deo réddidit.
Córdubæ, in Hispánia, sanctárum Vírginum et Mártyrum Floræ et Maríæ; quæ, post diutúrnos cárceres, in persecutióne Arábica, gládio interémptæ sunt.
Medioláni sancti Protásii Epíscopi, qui apud Constántem Imperatórem in Concílio Sardicénsi causam Athanásii deféndit, ac demum, pro Ecclésia sibi commíssa et pro religióne multis perfúnctus labóribus, migrávit ad Dóminum.
In território Arvernénsi sancti Portiáni Abbátis, qui, sub Theodoríco Rege, miráculis cláruit; cujus étiam nomen índitum mansit tam monastério cui Sanctus ipse prǽfuit, quam óppido quod in eódem loco póstea constrúctum fuit.
In castro Blávio, in Gállia, sancti Románi Presbýteri, cujus sanctitátis præcónium glória miraculórum declárat.