Nono Kaléndas Januárii
_
Vigília Nativitátis Dómini nostri Jesu Christi. 
Cracóviæ, in Polónia, natális sancti Joánnis Cántii, Presbýteri et Confessóris, quem, doctrína, propagándæ fídei zelo, virtútibus ac miráculis clarum, Clemens Décimus tértius, Póntifex Máximus, Sanctórum número adscrípsit. Ejus autem festívitas tertiodécimo Kaléndas Novémbris celebrátur.
Apud Spolétum sancti Gregórii, Presbýteri et Mártyris; qui, tempóribus Diocletiáni et Maximiáni Imperatórum, primo nodósis fústibus cæsus, ac deínde, post cratículam et cárcerem, cárduis férreis in génibus percússus, sed et ardéntibus lampádibus per látera incénsus, tandem est decollátus.
Trípoli, in Phœnícia, sanctórum Mártyrum Luciáni, Metróbii, Pauli, Zenóbii, Theotími et Drusi.
Nicomedíæ sancti Euthýmii Mártyris, qui, in persecutióne Diocletiáni, cum multos ad martýrium præmisísset, et ipse, ense transfíxus, eos secútus est ad corónam.
Antiochíæ natális sanctárum Vírginum quadragínta, quæ, in Deciána persecutióne, per divérsa torménta martýrium consummárunt.
Burdígalæ sancti Delphíni Epíscopi, qui, Theodósii témpore, cláruit sanctitáte.
Romæ natális sanctæ Tharsíllæ Vírginis, ámitæ sancti Gregórii Papæ, de qua ipse testátur quod in hora éxitus sui Jesum ad se veniéntem víderit.
Tréviris sanctæ Irminæ Vírginis, fíliæ Dagobérti Regis.