Tértio Kaléndas Januárii
_
Romæ natális sancti Felícis Primi, Papæ et Mártyris, qui sub Aureliáno Príncipe Ecclésiam rexit. Ipsíus tamen festum tértio Kaléndas Júnii celebrátur.
Spoléti item natális sanctórum Mártyrum Sabíni, Assisiénsis Epíscopi, atque Exsuperántii et Marcélli Diaconórum, ac Venustiáni Prǽsidis cum uxóre et fíliis, sub Maximiáno Imperatóre. Ex ipsis Marcéllus et Exsuperántius, primum equúleo suspénsi, deínde fústibus gráviter mactáti, postrémum, abrási úngulis et láterum exustióne assáti, martýrium complevérunt; Venustiánus autem non multo post, simul cum uxóre et fíliis, est gládio necátus; sanctus vero Sabínus, post detruncatiónem mánuum et diútinam cárceris maceratiónem, ad mortem usque cæsus est. Horum martýrium, licet divérso exstíterit témpore, una tamen die recólitur.
Alexandríæ sanctórum Mansuéti, Sevéri, Appiáni, Donáti, Honórii et Sociórum Mártyrum.
Thessalonícæ sanctæ Anýsiæ Mártyris.
Ibídem sancti Anýsii, ejúsdem civitátis Epíscopi.
Medioláni sancti Eugénii, Epíscopi et Confessóris.
Ravénnæ sancti Libérii Epíscopi.
Aquilæ, in Vestínis, sancti Rainérii Epíscopi.