Séptimo Idus Februárii
_
Sancti Romuáldi Abbátis, Monachórum Camaldulénsium Patris, cujus dies natális tertiodécimo Kaléndas Júlii recensétur, sed festívitas hac die, ob Translatiónem córporis ejus, potíssimum celebrátur.
Augústæ, cui nunc Londíni nomen, in Británnia, natális beáti Auguli Epíscopi, qui, ætátis cursu per martýrium expléto, ætérna prǽmia suscípere méruit.
In Phrýgia sancti Adáuci Mártyris, qui, ex Itálico génere clarus, et omni fere dignitátum gradu ab Imperatóribus insignítus, tandem, cum adhuc Quæstóris offício fungerétur, martýrii coróna pro fídei defensióne dignátus est.
Ibídem plurimórum sanctórum Mártyrum, urbis uníus cívium, quorum dux erat idem Adáucus; qui, cum omnes Christiáni essent, et constánter in fídei confessióne persísterent, a Galério Maximiáno Imperatóre sunt igne consúmpti.
Heracléæ, in Ponto, sancti Theodóri, ductoris mílitum, qui, Licínio imperánte, post multa torménta, truncátus cápite, victor migrávit in cælum.
In Ægýpto sancti Móysis, Epíscopi venerábilis, qui primum in erémo vitam solitáriam duxit; deínde, peténte Regína Saracenórum Máuvia, Epíscopus factus, gentem illam ferocíssimam magna ex parte ad fidem convértit, et gloriósus méritis quiévit in pace.
Lucæ, in Túscia, deposítio sancti Richárdi, Regis Anglórum, qui pater éxstitit sancti Willebáldi, Eystetténsis Epíscopi, ac sanctæ Walbúrgæ Vírginis.
Bonóniæ sanctæ Juliánæ Víduæ.