Décimo Kaléndas Mártii
_
Tyri, in Phœnícia, commemorátio beatórum Mártyrum, quorum númerum solíus sciéntia Dei cólligit. Hi omnes, sub Diocletiáno Imperatóre, a Vetúrio, mílitum magístro, multis tormentórum genéribus, sibi invícem succedéntibus, occísi sunt; nam, primo quidem flagris toto córpore dilaniáti, inde divérsis bestiárum genéribus tráditi, sed ab illis divína virtúte nil læsi, post, áddita feritáte ignis ac ferri, martýrium consummárunt. Eórum vero gloriósam multitúdinem ad victóriam incitábant Epíscopi Tyránnio, Silvánus, Péleus et Nilus, ac Présbyter Zenóbius, qui, felíci agóne, una cum illis, martýrii palmam adépti sunt.
Constantinópoli sancti Eleuthérii, Epíscopi et Mártyris.
In Pérside natális sancti Eleuthérii, Epíscopi, et aliórum centum vigínti octo; qui, sub Rege Persárum Sápore, cum Solem adoráre renuíssent, crudéli nece præcláras sibi corónas comparárunt.
In Cypro sanctórum Mártyrum Potámii et Nemésii.
Cátanæ, in Sicília, sancti Leónis Epíscopi, qui virtútibus atque miráculis coruscávit.
Eódem die sancti Euchérii, Aurelianénsis Epíscopi, qui eo magis miráculis cláruit, quo plúribus invidórum calúmniis fuit oppréssus.
Tornáci, in Gálliis, sancti Eleuthérii, Epíscopi et Confessóris.