Quinto Kaléndas Mártii
_
In Ægýpto natális sanctórum Mártyrum Victoríni, Victóris, Nicéphori, Claudiáni, Dióscori, Serapiónis et Pápiæ, sub Numeriáno Imperatóre. Horum duo primi, pro confessióne fídei, exquisíta suppliciórum génera constánter passi, cápite plectúntur; Nicéphorus, post cratículas candéntes ignésque superátos, minutátim concísus est; Claudiánus et Dióscorus flammis incénsi; Serápion vero et Pápias gládio cæsi sunt.
In Africa sanctórum Mártyrum Donáti, Justi, Herénæ et Sociórum.
Constantinópoli sancti Tharásii Epíscopi, eruditióne et pietáte insígnis; ad quem exstat Hadriáni Papæ Primi epístola pro defensióne sanctárum Imáginum.
Naziánzi, in Cappadócia, sancti Cæsárii, qui beátæ Nonnæ fílius ac beatórum Gregórii Theólogi et Gorgóniæ fuit frater, et quem idem Gregórius inter ágmina beatórum se vidísse testátur.
In monastério Heidenhémii, diœcésis Eystetténsis, in Germánia, sanctæ Walbúrgæ Vírginis, quæ fuit fília sancti Richárdi, Anglórum Regis, et soror sancti Willebáldi, Eystetténsis Epíscopi.