Nono Kaléndas Aprílis
_
Festum sancti Gabriélis Archángeli, qui ad annuntiándum Incarnatiónis divíni Verbi mystérium a Deo missus est.
Romæ sancti Epigménii Presbýteri, qui, in persecutióne Diocletiáni, sub Túrpio Júdice, gládio cæsus, martýrium consummávit.
Ibídem pássio beáti Pigménii Presbýteri, qui, sub Juliáno Apóstata, pro fide Christi, præcipitátus in Tíberim, necátus est.
Item Romæ sanctórum Mártyrum Marci et Timóthei, qui martýrio coronáti sunt sub Antoníno Imperatóre.
Cæsaréæ, in Palæstína, natális sanctórum Mártyrum Timolái, Dionýsii, Páusidis, Rómuli, Alexándri, altérius Alexándri, Agápii et altérius Dionýsii; qui, in persecutióne Diocletiáni, sub Urbáno Prǽside, secúris ictu percússi, vitæ corónas meruérunt.
In Mauritánia item natális sanctórum fratrum Rómuli et Secúndi, qui pro Christi fide passi sunt.
Tridénti pássio sancti Simeónis púeri, a Judǽis sævíssime trucidáti, qui multis póstea miráculis coruscávit.
Sýnnadæ, in Phrýgia, sancti Agapíti Epíscopi.
Bríxiæ sancti Latíni Epíscopi.
In Sýria sancti Seléuci Confessóris.
In Suécia sanctæ Catharínæ Vírginis, quæ fuit fília sanctæ Birgíttæ.