Quarto Nonas Aprílis
_
Turónis, in Gállia, sancti Francísci de Paula Confessóris, qui Ordinis Minimórum Institútor éxstitit; atque, virtútibus et miráculis clarus, a Leóne Papa Décimo in Sanctórum númerum est adscríptus.
Cæsaréæ, in Palæstína, natális sancti Apphiáni Mártyris, qui, ante sanctum Ædésium Mártyrem, fratrem suum, in persecutióne Galérii Maximiáni, cum Prǽsidem Urbánum idólis immolántem arguísset, sæve dilaniátus est, et, pédibus lino in oleum intíncto eóque incénso obvolútis, acerbíssime cruciátus, ac demum in mare demérsus; atque ita, tránsiens per ignem et aquam, edúctus est in refrigérium.
Ibídem pássio sanctæ Theodósiæ, Vírginis Týriæ, quæ, in eádem persecutióne, cum sanctos Confessóres ante tribúnal stantes públice salutásset, atque rogásset eos, ut, cum ad Dóminum perveníssent, sui recordaréntur, a milítibus tenta et ad Urbánum Prǽsidem ducta est; eoque jubénte, latéribus et mammis ad interióra usque dilaniátis, in mare tandem projícitur.
Apud Língonas, in Gállia, sancti Urbáni Epíscopi.
Apud Comum sancti Abúndii, Epíscopi et Confessóris.
Cápuæ sancti Victóris Epíscopi, eruditióne et sanctitáte conspícui.
Lugdúni, in Gállia, sancti Nicétii, ejúsdem urbis Epíscopi, vita et miráculis clari.
In Palæstína deposítio sanctæ Maríæ Ægyptíacæ, quæ Peccátrix appellátur.