Tértio Nonas Aprílis
_
Romæ natális beáti Xysti Primi, Papæ et Mártyris; qui, tempóribus Hadriáni Imperatóris, summa cum laude rexit Ecclésiam, ac demum, sub Antoníno Pio, ut sibi Christum lucrifáceret, libénter mortem sustínuit temporálem.
Tauroménii, in Sicília, sancti Pancrátii Epíscopi, qui Christi Evangélium, quod a sancto Petro Apóstolo illuc missus prædicáverat, martýrii sánguine consignávit.
Tomis, in Scýthia, natális sanctórum Mártyrum Evágrii et Benígni.
Tyri, in Phœnícia, sancti Vulpiáni Mártyris, qui, in persecutióne Maximiáni Galérii, cum áspide et cane insútus cúleo, in mare demérsus fuit.
Thessalonícæ pássio sanctárum Vírginum Agapis et Chióniæ, Diocletiáno Imperatóre, sub quo et sancta Virgo Iréne, eárum soror, póstmodum passúra erat. Ambæ vero, cum Christum negáre nollent, primum in cárcere macerátæ sunt, póstea in ignem missæ, sed a flammis intáctæ, ibi, oratióne ad Dóminum fusa, ánimas reddidérunt.
In monastério Medícii, in Bithýnia, deposítio sancti Nicétæ Abbátis, qui ob cultum sanctárum Imáginum, sub Leóne Arméno, multa passus est, ac tandem, juxta Constantinópolim, Conféssor quiévit in pace.
In Anglia sancti Richárdi, Epíscopi Cicestrénsis, sanctitáte et miraculórum glória conspícui.
Eboríaci, in território Meldénsi, sanctæ Burgundofáræ, étiam Faræ nómine appellátæ, Abbatíssæ et Vírginis.