Quarto Idus Aprílis
_
Apud Babylónem sancti Ezechiélis Prophétæ, qui, a Júdice pópuli Israël, quod eum de cultu idolórum argúeret, interféctus, in sepúlcro Sem et Arpháxad, Abrahæ progenitórum, sepúltus est; ad quod sepúlcrum, oratiónis causa, multi conflúere consuevérunt.
Romæ natális plurimórum sanctórum Mártyrum, quos sanctus Alexánder Papa, cum detinerétur in cárcere, baptizávit. Hos autem omnes Aureliánus Præféctus, navi vetústæ impósitos, in altum mare dedúci, et illic, ligátis ad colla lapídibus, mergi præcépit.
Alexandríæ sanctórum Mártyrum Apollónii Presbýteri, et aliórum quinque, qui, in persecutióne Maximiáni, in mare demérsi sunt.
In Africa sanctórum Mártyrum Teréntii, Africáni, Pompéji et Sociórum; qui, sub Décio Imperatóre et Fortuniáno Præfécto, virgis cæsi, equúleis torti aliísque supplíciis cruciáti, demum cápitis obtruncatióne martýrium complevérunt.
Gandávi, in Flándria, sancti Macárii, Epíscopi Antiochéni, virtútibus et miráculis clari.
Vallisoléti, in Hispánia, sancti Michaélis de Sanctis, ex Ordine Discalceatórum sanctíssimæ Trinitátis redemptiónis captivórum, Confessóris, innocéntia vitæ, admirábili pæniténtia et caritáte in Deum exímii; quem Pius Nonus, Póntifex Máximus, inter Sanctos rétulit.