Séptimo Kaléndas Maji
_
Romæ Litaníæ majóres ad sanctum Petrum. 
Alexandríæ natális beáti Marci Evangelístæ. Hic, discípulus et intérpres Apóstoli Petri, rogátus Romæ a frátribus scripsit Evangélium, quo assúmpto, perréxit in Ægýptum, primúsque Alexandríæ Christum annúntians, constítuit Ecclésiam; ac póstea, pro fide Christi tentus, fúnibus vinctus et per saxa raptátus, gráviter afflíctus est; deínde, reclúsus in cárcere, primo angélica visitatióne confortátus est, et demum, ipso Dómino sibi apparénte, ad cæléstia regna vocátus, octávo Nerónis anno.
Item Alexandríæ sancti Aniáni Epíscopi, qui, beáti Marci discípulus ejúsque in Episcopátu succéssor, clarus virtútibus quiévit in Dómino.
Antiochíæ sancti Stéphani, Epíscopi et Mártyris, qui ab hæréticis Synódum Chalcedonénsem impugnántibus, multa passus, in Oróntem flúvium præcipitátus est, témpore Zenónis Imperatóris.
Syracúsis, in Sicília, sanctórum Mártyrum fratrum Evódii, Hermógenis et Callístæ.
Láubiis, in Bélgio, natális sancti Ermíni, Epíscopi et Confessóris.
Antiochíæ sanctórum Philónis et Agathopódis Diaconórum, de quibus beátus Ignátius, Epíscopus et Martyr, laudábilem in suis epístolis mentiónem facit.