Séptimo Idus Maji
_
Naziánzi, in Cappadócia, natális beáti Gregórii Epíscopi, Confessóris et Ecclésiæ Doctóris, ob singulárem divinárum rerum doctrínam cognoménto Theólogi; qui collápsam Constantinópoli cathólicam fidem, ipsíus urbis Episcopátum gerens, restítuit, hæresésque insurgéntes compréssit.
Romæ sancti Hermæ, cujus Apóstolus Paulus in Epístola ad Romános méminit. Ipse autem Hermas, digne semetípsum sacríficans acceptabilísque Deo hóstia factus, virtútibus clarus cæléstia regna petívit.
Cállii, via Flamínia, pássio sancti Geróntii, Epíscopi Ficoclénsis.
In Pérside sanctórum Mártyrum trecentórum et decem.
In Ægýpto sancti Pachómii Abbátis, qui plúrima erexit in ea regióne monastéria, et régulam Monachórum scripsit, quam ab Angelo dictánte didícerat.
In castro Vindecíno, in Gállia, deposítio sancti Beáti Confessóris.
Bonóniæ beáti Nicolái Albergáti, Mónachi Carthusiáni, ejúsdem civitátis Epíscopi et sanctæ Románæ Ecclésiæ Cardinális, sanctitáte et Apostólicis Legatiónibus clari; cujus corpus Floréntiæ, apud Carthusiános, cónditum est.
Constantinópoli Translátio sanctórum Andréæ Apóstoli, et Lucæ Evangelístæ de Acháia; et Timóthei, uníus ex discípulis beáti Pauli Apóstoli, ab Epheso. Corpus autem sancti Andréæ, longo post témpore Amálphim devéctum, ibi pio fidélium concúrsu honorátur; ex cujus sepúlcro liquor ad languóres curándos júgiter manat.
Romæ item Translátio sancti Hierónymi Presbýteri, Confessóris et Ecclésiæ Doctóris, ex Béthlehem Judæ ad Basílicam sanctæ Maríæ ad Præsépe.
Bárii quoque, in Apúlia, Translátio sancti Nicolái, Epíscopi et Confessóris, e Myra, civitáte Lýciæ.