Quarto Idus Maji
_
Romæ, via Ardeatína, sanctórum Mártyrum Nérei et Achíllei fratrum, qui primo cum Flávia Domitílla, cujus erant eunúchi, in ínsula Póntia longum pro Christo duxérunt exsílium; póstmodum gravíssimis verbéribus attrectati sunt; deínde, cum a Minútio Rufo, viro Consulári, equúleo et flammis ad immolándum compelleréntur, diceréntque se, a beáto Petro Apóstolo baptizátos, nulla ratióne posse idólis immoláre, cápite cæsi sunt. Horum sacræ relíquiæ, simúlque Fláviæ Domitíllæ, ex Diaconía sancti Hadriáni in antíquum eórum Títulum, ubi asservabántur olim recónditæ, dénuo restaurátum, solémniter translátæ sunt prídie hujus diéi, jussu Cleméntis Papæ Octávi; qui exínde hodiérna celebrándum die indíxit étiam festum ipsíus beátæ Domitíllæ Vírginis, cujus pássio Nonis hujus mensis recensétur.
Item Romæ, via Aurélia, sancti Pancrátii Mártyris, qui, cum esset annórum quatuórdecim, sub Diocletiáno, cápitis obtruncatióne martýrium complévit.
Salamínæ, in Cypro, sancti Epiphánii Epíscopi, qui, multíplici eruditióne et sacrárum sciéntia litterárum excéllens, vitæ quoque sanctitáte, zelo cathólicæ fídei, munificéntia in páuperes et virtúte miraculórum éxstitit admirándus.
Constantinópoli sancti Germáni Epíscopi, doctrína et virtútibus insígnis, qui Leónem Isáuricum, edictum advérsus sacras Imágines promulgántem, magna fidúcia redárguit.
Tréviris sancti Modoáldi Epíscopi.
Romæ sancti Dionýsii, qui éxstitit pátruus sancti Pancrátii Mártyris.
Argýrii, in Sicília, sancti Philíppi Presbýteri, qui, a Románo Pontífice ad eándem Sicíliam ínsulam missus, magnam illíus partem convértit ad Christum. Ipsíus vero sánctitas in liberándis energúmenis maxime declarátur.
In civitáte Calciaténsi, in Hispánia, sancti Domínici Confessóris.