Prídie Idus Maji
_
Tarsi, in Cilícia, natális sancti Bonifátii Mártyris, qui, sub Diocletiáno et Maximiáno passus, deínde Romam advéctus, via Latína sepúltus est.
In Gállia sancti Póntii Mártyris, cujus prædicatióne et indústria postquam duo Philíppi Cǽsares ad Christi fidem convérsi sunt, ipse, sub Valeriáno et Galliéno Princípibus, martýrii palmam adéptus est.
In Sýria sanctórum Mártyrum Victóris et Coronæ, sub Antoníno Imperatóre; ex quibus Victor a Sebastiáno Júdice váriis et horréndis afféctus est cruciátibus. Cum autem ipsum Coróna, uxor cujúsdam mílitis, cœpísset beátum prædicáre ob martýrii constántiam, vidit duas corónas de cælo lapsas, unam Victóri et álteram sibi missam; cumque hoc audiéntibus cunctis testarétur, ipsa quidem inter árbores scissa, Victor vero decollátus est.
In Sardínia sanctárum Mártyrum Justæ, Justínæ et Henedínæ.
Ferénti, in Túscia, sancti Bonifátii Epíscopi, qui (ut refert beátus Gregórius Papa) sanctitáte et miráculis a puerítia cláruit.
In pago Betharram, diœcésis Baionénsis, sancti Michaélis Garicoïts, Confessóris, Congregatiónis Presbyterórum Missionariórum a Sacro Corde Jesu Fundatóris, apostólico zelo insígnis, quem Pius Papa Duodécimus Sanctórum fastis adscrípsit.
Niciæ, in Subalpínis, sanctæ Maríæ Domínicæ Mazzaréllo, Cofundatrícis Institúti Filiárum Maríæ Auxiliatrícis, quæ, humilitáte, prudéntia et caritáte præclára, in album sanctárum Vírginum a Pio Papa Duodécimo fuit reláta.