Nono Kaléndas Júlii
_
Vigília Nativitátis sancti Joánnis Baptístæ. 
Romæ sancti Joánnis Presbýteri, qui, sub Juliáno Apóstata, via Salária véteri, ante simulácrum Solis decollátus est, et corpus ejus a beáto Concórdio Presbýtero juxta Mártyrum Concília sepúltum.
Item Romæ sanctæ Agrippínæ, Vírginis et Mártyris, quæ sub Valeriáno Imperatóre martýrium consummávit. Ipsíus autem corpus, in Sicíliam translátum ac Menis cónditum, multis miráculis corúscat.
Sútrii, in Túscia, sancti Felícis Presbýteri, cujus os támdiu jussit Túrcius Præféctus lápide contúndi, donec ipse Felix emítteret spíritum.
Nicomedíæ commemorátio plurimórum sanctórum Mártyrum, qui, témpore Diocletiáni, in móntibus et spelúncis laténtes, pro Christi nómine martýrium læto ánimo subiérunt.
Philadelphíæ, in Arábia, sanctórum Mártyrum Zenónis, ejúsque servi Zenæ. Hic dómini sui vincti caténas exósculans, eúmque rogans ut se in torméntis partícipem dignarétur habére, a milítibus tentus est, et cum ipso dómino parem martýrii corónam accépit.
Augústæ Taurinórum sancti Joséphi Cafásso, Sacerdótis, qui levítis pietáte et sciéntia augéndis atque damnátis cápite Deo conciliándis fuit illústris, et a Pio Papa Duodécimo inter sanctos Cǽlites adscríptus est.
In monastério Elyénsi, in Británnia, sanctæ Ediltrúdis, Regínæ et Vírginis, quæ sanctitáte et miráculis clara migrávit ad Dóminum. Ipsíus autem corpus, úndecim post annis, invéntum est incorrúptum.