Prídie Nonas Júlii
_
Hierosólymis sancti Isaíæ Prophétæ, qui, sub Manásse Rege, in duas sectus partes occúbuit, sepultúsque est sub quercu Rogel, juxta tránsitum aquárum.
Fǽsulis, in Túscia, sancti Rómuli, Epíscopi et Mártyris, qui fuit beáti Petri Apóstoli discípulus. Hic, ab eódem Apóstolo missus ad prædicándum Evangélium, in multis Itáliæ locis Christum annuntiávit; ac tandem, Fǽsulas regréssus, ibi, sub Domitiáno Príncipe, martýrio coronátus est cum áliis Sóciis.
Romæ natális sancti Tranquillíni Mártyris, patris sanctórum Marci et Marcelliáni, qui, ad prædicatiónem sancti Sebastiáni Mártyris convérsus ad Christum, a beáto Polycárpo Presbýtero baptizátus est, et a sancto Cajo Papa Présbyter ordinátus. Ipse, die Octavárum Apostolórum, cum ad confessiónem beáti Pauli oráret, ibídem, sub Diocletiáno Imperatóre, a Pagánis tentus est, et, ab eis lapidátus, martýrium consummávit.
Londíni, in Anglia, sancti Thomæ More, regni Cancellárii, qui, pro fide cathólica ac beáti Petri primátu, jubénte Henríco Octávo Rege, decollátus est.
In Campánia sanctæ Domínicæ, Vírginis et Mártyris, quæ, sub Diocletiáno Imperatóre, cum fregísset idóla, hinc ad béstias damnáta, sed ab illis nil læsa, demum, cápite obtruncáta, migrávit ad Dóminum. Ipsíus vero corpus Tropéæ, in Calábria, summa veneratióne asservátur.
Eódem die sanctæ Lúciæ Mártyris, quæ, natióne Campána, a Ríxio Varo Vicário tenta et ácriter cruciáta, eúndem convértit ad Christum; quibus adjúncti sunt Antonínus, Sevérinus, Diodórus, Dion, et álii decem et septem, qui in passióne collégæ et in coróna fuére consórtes.
Neptúni, in Látio, sanctæ Maríæ Gorétti, piíssimæ adolescéntis, in defendénda virginitáte crudelíssime necátæ, quam Pius Papa Duodécimus sanctárum Mártyrum catálogo solémniter accénsuit.
In pago Trevirénsi sancti Goaris, Presbýteri et Confessóris.