Quintodécimo Kaléndas Augústi
_
Sancti Camílli de Lellis, Presbýteri et Confessóris, Clericórum Regulárium infírmis ministrántium Institutóris, cæléstis hospitálium et infirmórum Patróni; cujus dies natális prídie Idus Júlii recólitur.
Tíbure sanctæ Symphorósæ, uxóris sancti Getúlii Mártyris, cum septem fíliis suis, scílicet Crescénte, Juliáno, Nemésio, Primitívo, Justíno, Stácteo et Eugénio. Horum mater, sub Hadriáno Príncipe, ob insuperábilem constántiam, primo cæsa diu palmis, deínde crínibus suspénsa, novíssime saxo alligáta, in flumen præcipitáta est; fílii autem, stipítibus ad tróchleas exténsi, divérso mortis éxitu martýrium complevérunt. Eorúndem córpora póstea Romam transláta, et, Pio Quarto Summo Pontífice, in Diaconía sancti Angeli in Piscína fuérunt invénta.
Trajécti sancti Frideríci, Epíscopi et Mártyris.
Doróstori, in Mýsia inferióre, sancti Æmiliáni Mártyris, qui, témpore Juliáni Apóstatæ, sub Capitolíno Prǽside, in fornácem injéctus, martýrii palmam accépit.
Carthágine sanctæ Gundénis Vírginis, quæ, jussu Rufíni Procónsulis, ob Christi confessiónem, quater divérsis tempóribus per extensiónem in equúleo torta, et úngulis horrénde lacerántibus cruciáta, cárceris squalóre diu afflícta, novíssime gládio cæsa est.
Gallǽciæ, in Hispánia, sanctæ Marínæ, Vírginis et Mártyris.
Medioláni sancti Matérni Epíscopi, qui, sub Maximiáno Imperatóre, pro fide Christi et pro Ecclésia sibi commíssa, in cárcerem detrúsus et sæpe verbéribus cæsus est; ac tandem, multis confessiónibus clarus, obdormívit in Dómino.
Bríxiæ natális sancti Philástrii, qui fuit ejúsdem civitátis Epíscopus. Hic advérsus hæréticos, præsértim Ariános, a quibus multa passus est, plúrimum verbis scriptísque pugnávit; demum, clarus miráculis, Conféssor in pace quiévit.
Metis, in Gállia, sancti Arnúlphi Epíscopi, qui, sanctitáte et miráculis illústris, eremíticam delégit vitam, et beáto fine quiévit.
Signiæ sancti Brunónis, Epíscopi et Confessóris.
Foro Pompílii, in Æmília, sancti Ruffílli, ejúsdem civitátis Epíscopi.