Nono Kaléndas Augústi
_
Tyri, apud lacum Vulsínium, in Túscia, sanctæ Christínæ, Vírginis et Mártyris. Hæc Virgo, cum patris idóla áurea et argéntea, in Christum credens, comminuísset atque illórum frágmina paupéribus erogásset, ejúsdem patris jussu verbéribus dilaniáta est, aliísque supplíciis diríssime cruciáta, et cum magno saxi póndere in lacum projécta, sed ab Angelo liberáta; deínde, sub alio Júdice, patris sui successóre, acerbióra torménta constánter pértulit; novíssime, sub Juliáno Prǽside, post fornácem ardéntem, ubi quinque diébus illǽsa permánsit, post serpéntes virtúte Christi superátos, martýrii sui cursum abscissióne linguæ et sagittárum infixióne complévit.
Romæ, via Tiburtína, sancti Vincéntii Mártyris.
Amitérni, in Vestínis, pássio sanctórum mílitum octogínta trium.
Eméritæ, in Hispánia, sancti Victóris, viri militáris, qui, cum frátribus Stercátio et Antinógene, in persecutióne Diocletiáni, per divérsa supplícia martýrium consummávit.
Item sanctórum Mártyrum Menéi et Capitónis.
In Lýcia sanctárum Mártyrum Nicétæ et Aquilínæ, quæ, beáti Christóphori Mártyris prædicatióne ad Christum convérsæ, martýrii palmam obtruncatióne cápitis sumpsérunt.
Apud Sénonas sancti Ursicíni, Epíscopi et Confessóris.